ଯେତେବେଳେ କେତେକ ବଙ୍ଗଭାଷୀଙ୍କ ଚକ୍ରାନ୍ତରେ ଓଡ଼ିଆ ଭାଷା ଖୁବ୍ ଦୁର୍ଦ୍ଦିନରେ ଗତି କରୁଥିଲା ସେତେବେଳେ ଯେଉଁ ମହାରଥୀମାନେ ଲେଖନୀଅସ୍ତ୍ର ବଳରେ ଶତ୍ରୁଙ୍କୁ ପରାହତ କରି ମାତୃଭାଷାର ସୁରକ୍ଷା କରିଥିଲେ ଏବଂ ଓଡ଼ିଆ ଜାତିକୁ ଉଦ୍ବୁଦ୍ଧ କରିଥିଲେ , ସେ ରଣାଙ୍ଗନରେ ସେନାପତି ସେନାପତି ଭାଵେ ଅଗ୍ରଗଣ୍ୟ ହେଲେ ବି ସୈନିକଙ୍କ ମଧ୍ୟରେ ସ୍ୱର୍ଗୀୟ ପଣ୍ଡିତ ଗୋଦାବରୀଶ ମିଶ୍ରଙ୍କର ନାମକୁ ଉପେକ୍ଷା କରାଯାଇ ନ ପାରେ।
ତାଙ୍କ ଉଦ୍ଵୋଧନ କବିତା ଯେପରି ଭାଵଗର୍ଭକ ସେହିପରି କାନ୍ତକୋମଳପଦାବଳୀ ଯୁକ୍ତ ତଥା ଓଡ଼ିଆ ମାଟିପାଣିପବନମିଶା ପରମ୍ପରାର ସୁଗନ୍ଧ ବହନକାରୀ । ମୋ ପିଲାଦିନର ଅତି ଅନ୍ତରଙ୍ଗ ସାଥୀ ଏଇ କବିତା ଯାହାକୁ ମୁଁ ପ୍ରତି ମୁହୂର୍ତ୍ତରେ ଗୁଣୁଗୁଣୁ ହୋଇ ବୋଲୁଥିଲି ।
#ଉଦ୍ଵୋଧନ
ତୁଙ୍ଗ-ଶିଖରୀଚୂଳ କୁଞ୍ଜକାନନ-ମାଳ
ପୁଣ୍ୟ ଜଳଧି-ଜଳ ଖେଳି ଉଠେ ସଘନେ,
ପ୍ରାଚୀଗଗନ-ଶିରେ ଭାସି କନକ-ନୀରେ
ଆସ ତପନ ଉଇଁ ଏ ଉତ୍କଳ ଭୁଵନେ ।ଘୋଷା ।
ଆଜି କି ସରଗଛବି ରାଜେ ରୁଚିର
କି ନବଜୀଵନେ ଭରା କୋଟି ଅନ୍ତର
କିବା ଏ ସମ୍ପଦ ଶିରୀ ହୃଦେ ହୃଦେ ଆସେ ପୂରି
କି ପୁଲକ-ଧାରା ଖେଳି ଆସେ କୋଟି ବଦନେ ।୧।
ଆହା ଏ ଉତ୍କଳ କିବା ସରଗଭୂମି
ବିଲ ବନ ଶୈଳ ସିନ୍ଧୁ ସୁଷମା ଘେନି !
ଜନମି ଏ ଦେଶେ ଆଜି ଏ ଜନନୀ କୋଳେ ରାଜି
ଧନ୍ୟ କୋଟି ନର ନାରୀ ମର ନର ଜୀବନେ ।୨। ଲଳିତ ଅଙ୍ଗ ବୀର ପ୍ରତାପ ଯା'ର
ପୁଣ୍ୟ ତେଜେ ଧରାମୁଖ କଲେ ଉଜ୍ଜ୍ୱଳ ,
ଶାସିଲେ ଅତୁଲ୍ୟବଳେ ପାଳିଲେ ସେନେହଭରେ
ଏ ସବୁ , ଓଡ଼ିଆ ଦିନେ ଦେଖିଛ ସେ ନୟନେ ।୩।
ବିପୁଳ ଓଡ଼ିଆ ସେନା ବାହୁ ବିଜୟେ
ହିମାଚଳଚୂଡ଼ୁଁ ଦିନେ କୁମାରିକା ଯାଏ
ହୃଦୟ ଶୋଣିତ ଢାଳି ଦେଇ ନିଜ ଶିରବଳି
କୀର୍ତ୍ତିଧ୍ୱଜା ଉଡ଼ାଇଲେ କି ପୁଲକ ପରାଣେ ।୪।
ବାରବାଟୀ ଦୁର୍ଗେ ବୀର ଓଡ଼ିଆ ସୁତ ,
ଶତ ଶତ୍ରୁସେନା ନାଶି କିବା ମହତ ?
ଭାଙ୍ଗିଛି ସେ ବାରବାଟୀ ସେ ଶିରୀ ଯାଇଛି ତୁଟି
(ତେବେ)ରହିଛି ସେ ଯଶ ମିଶି ଜଳେସ୍ଥଳେ ପବନେ।୫।
କୋଣାର୍କ-ଜୀର୍ଣ୍ଣ-ସଉଧେ ଉତ୍କଳ-କୀର୍ତ୍ତି,
ଦିଶେ ଦିଶେ ଆଜି କିବା ବିକଶେ ଫୁଟି ,
ନୀଳାଚଳେ ଜଗନ୍ନାଥ ଯୁଗେ ଯୁଗେ ବିରାଜିତ
ଉତ୍କଳ ମହିମା-ଘୋଷ ଏ ଭାରତ ଭୁଵନେ ।୬।
ବିମଳ-ଚିଲିକା-ବକ୍ଷେ ଖେଳୁ ସେ ବୀଚି ,
ଉଠୁ ମହୋଦଧି-ବାରି ଅମୃତ ସିଞ୍ଚି ,
ମହେନ୍ଦ୍ର ଶ୍ୟାମଳ ଚୂଳେ ପୂତ ଚିତ୍ରୋତ୍ପଳା ନୀରେ
ଢଳୁ ସେ ସମ୍ପଦ ଶିରୀ ଗ୍ରାମ ବିଲ କାନନେ ।୭।
ତୋ ଭଳି ଜନନୀ ଥାଉଁ, ଜନମଭୂମି ,
କି ଦୁଃଖ ଏ ଓଡ଼ିଆର ପରାଣେ ପୁଣି ?
ମୋହନ ମୂରତି ସେହି ଦିଅ ଗୋ ମା ଆଜି ଫେଇ
କୋଟିଏ ସନ୍ତାନ ତୋର ପ୍ରଣମୁଁ ଏ ଚରଣେ ।୮।
ଜୟ ଉତ୍କଳ ଜନନୀ ।
Saturday, March 11, 2023
ଉଦ୍ବୋଧନୀ
Subscribe to:
Post Comments (Atom)
ଲୁହ
ଅଟକୁନି ଲୁହ ବୋହି ଚାଲୁଛି ଅନବରତ ଆଖିବି ନିଜର କରି ରଖି ପାରୁନି ଏ ଲୁହକୁ,,,, ବାସ୍ ଝରି ଯାଉଛି ଟୋପା ଟୋପା ହୋଇ! ମନର ବ୍ୟଥା ହୃଦୟର କୋହ ସତରେ ଭା...
-
ଅଟକୁନି ଲୁହ ବୋହି ଚାଲୁଛି ଅନବରତ ଆଖିବି ନିଜର କରି ରଖି ପାରୁନି ଏ ଲୁହକୁ,,,, ବାସ୍ ଝରି ଯାଉଛି ଟୋପା ଟୋପା ହୋଇ! ମନର ବ୍ୟଥା ହୃଦୟର କୋହ ସତରେ ଭା...
-
★ 'ସାଧବ ଝିଅ' ଏବଂ କବି ମାୟାଧର ମାନସିଂହ ★ ----------------------------------------- ...
-
🔵🔵 ଓଡ଼ିଶା ଓ ଶ୍ରାଵଣ ଅମାଵାସ୍ୟା 🔵🔵 ✍ ଶିଶିର ସାହୁ ମନୋଜ ଶ୍ରାଵଣ ଅମାଵାସ୍ୟାକୁ ଓଡ଼ିଶାରେ ଚିତଉ ଅମାଵାସ୍ୟା ଵା ଚିତାଲା...
No comments:
Post a Comment