● ନବ-ଯୌବନ ଦର୍ଶନ ●

ନବ-ଯୌବନ ଦର୍ଶନ 

=============

ସ୍ନାନ ପୂର୍ଣ୍ଣିମାରେ ଶହେଆଠ ଗରା ଜଳରେ ସ୍ନାନ 

କରି ମଣ୍ଡପେ, ଚତୁର୍ଦ୍ଧାମୂର୍ତ୍ତିଙ୍କ ପ୍ରୀତ ହେଲା ମନ 

ଏତେଦିନ ଯାଏଁ ଵିଧି ପୂର୍ବକ ରତ୍ନବେଦୀ ପରେ 

ସ୍ନାନ ହେଉଥିଲା ତ ସଂକ୍ଷେପରେ ଦର୍ପଣ ଆଗରେ ll

ଅତିଶୟ ଆନନ୍ଦ ଆବେଗ ଓ ଆବେଶ ସହିତ 

ହେଲେ ପୁଣି ଗଜାନନ ବେଶ: ଶ୍ରଦ୍ଧାଳୁ ଅଭିଭୂତ 

କ୍ରିୟା ପ୍ରତିକ୍ରିୟା ରୂପେ ଘୋଟିଆସିଲା ଘୋର ଜ୍ୱର 

ଉତ୍ତାପ ଜ୍ୱାଳାରେ ଥରିଲେ ଠାକୁରାଣୀ ଓ ଠାକୁର ll

ଯିବାକୁ ହେବ ଵିଧି ନିର୍ଘଣ୍ଟ ଅନବସର ଘର 

ଯେଉଁଠି ହେବ ସେମାନଙ୍କର ଶୁଶ୍ରୁଷା ଉପଚାର 

ଏକ ପକ୍ଷ ଧରି ଚାଲିଲା ସେବା ଚିକିତ୍ସା ନିଦାନ 

ଫୁଲୁରି ତେଲ-ଚେର-ମୂଳ-ଫଳ କେତେ ଉପାଦାନ ll

କବିରାଜ ବୈଦ୍ୟ ଦଇତାପତିଙ୍କ ପ୍ରେମ ଭକ୍ତି ଯୁକ୍ତ 

ସେବାରେ କ୍ରମେ ଶରୀର ସୁଧାରି ହେଲେ ରୋଗମୁକ୍ତ 

ପ୍ରେମ ଭକ୍ତି ଯୁକ୍ତ ସେବା କି କେବେ ହୋଇପାରେ ବ୍ୟର୍ଥ? 

ଭକ୍ତ ଭଗବାନଙ୍କ ଲୀଳା ଅଭୂତପୂର୍ବ ଅଦ୍ଭୁତ!!! ll

ଆଷାଢ଼ ମାସ ଅମାବାସ୍ୟା ଦିନ ସେଇ ପୂଣ୍ୟତିଥି 

ନେତ୍ର ଖୋଲି ଚାହିଁଲେ ଆନନ୍ଦେ ସେ ଚତୁର୍ଦ୍ଧା ମୂରତି 

ଠାକୁର ଠାକୁରାଣୀ ସୁସ୍ଥ, ଏବେ ହେବ ନେତ୍ରୋତ୍ସବ 

ବିଗ୍ରହ ମାନଙ୍କ ଝଲସୁଛି ନେତ୍ର, ହେବ ଉତ୍ସବ ll

ଆହା କି ମନୋହର ଏହି ନବ ଯୌବନର ବେଶ 

ଧରାରେ ଯେମିତି ହୋଇଛନ୍ତି କୋଟି ସୂର୍ଯ୍ୟ ପ୍ରକାଶ 

ଜ୍ବରରୁ ଆରୋଗ୍ୟ ହୋଇ ମିଳିଅଛି ପୁନଃ ଯୌବନ 

ଆହାଃ କି ସୁନ୍ଦର ଦିଶଇ ସେ ଚକା ଚକା ନୟନ!

ଶୁଭ୍ରାଙ୍ଗ ଜ୍ୟେଷ୍ଠ ଭ୍ରାତା ପୀତବର୍ଣ୍ଣା ସୌମ୍ୟା ଭଗ୍ନୀ ସହ 

ଉଭା ହେବେ ଆଜି ଶ୍ରୀଜଗନ୍ନାଥ ଭବ୍ୟ କୃଷ୍ଣକାୟ 

ଫୁଟି ଉଠୁଛି ପ୍ରସରି ଯାଉଛି ଯୋଜନ ଯୋଜନ

ସେ ଦିବ୍ୟ କରୁଣା ଆଲୋକର କିରଣ ତେଜୀୟାନ ll

ତେଜୀୟାନ ନେତ୍ର, ଯୌବନୋଦୀପ୍ତ କଳେବର ଧରି 

ଦାଣ୍ଡକୁ ବାହାରିବାକୁ ଏବେ ପ୍ରସ୍ତୁତ ନରହରି 

ଭ୍ରାତା ଭଗିନୀଙ୍କୁ ଧରି କରିବେ ନବଦିନ ଯାତ 

ନାଚିବ ବଡଦାଣ୍ଡ, ନାଚିବେ ବି ପଞ୍ଚ ମହାଭୂତ ll

ଶ୍ରୀରଙ୍ଗା ଚରଣେ କରୁଛି କବି ମୁଗ୍ଧ ପ୍ରଣିପାତ:

ରକ୍ଷାକର କୃପାସିନ୍ଧୁ! ପୁଣି ହସି ଉଠୁ ଜଗତ 

ଜଗତ କର୍ତ୍ତା ତମେ ଆଜି ହୋଇଛ ଯୌବନ ପ୍ରାପ୍ତ 

ଆଶୀଷ ଦିଅ: ହସଖୁସି କେବେ ନହେଉ ଅପ୍ରାପ୍ତ ll

===================================

ପ୍ରମୋଦ କୁମାର ମହାନ୍ତି ll