ଉଭା ଯାତ୍ରା
=======
ତିନି ରଥ ହୋଇଛନ୍ତି ବଡ଼ଦାଣ୍ଡେ ଉଭା
ହସ୍ତ ନିର୍ମିତ ଚିତ୍ରିତ କେତେ ମନଲୋଭା
କେବେ ଆସି ବିଜେ ହେବେ ଦେବୀ-ମହାପ୍ରଭୁ
ବଡଦାଣ୍ଡ ଚାହିଁଛି, ବ୍ୟଗ୍ର ହେଲେଣି ସବୁ ll
ଚୌରାଳିଶ ଫୁଟ ଉଚ୍ଚ ତାଳଧ୍ୱଜ ରଥ
ଚଉଦ ଚକ ଲାଗିଛି, ବ୍ୟାସ ଫୁଟ ସାତ
ଲାଲ-ସବୁଜ ରଙ୍ଗରେ ଅଛି ବେହରଣ
ବଳଭଦ୍ର ହିଁ କରିବେ ଏହା ଆରୋହଣ ll
'ଉନ୍ନନି' ଧ୍ବଜା ରଥରେ ଉଡେ ଫରଫର
ଯାତ୍ରା ପାଇଁ ଚାରି ଅଶ୍ୱ ଅଛନ୍ତି ତତ୍ପର
'ତୀବ୍ର' 'ଘୋର' 'ଦୀର୍ଘଶର୍ମ' 'ସ୍ଵର୍ଣ୍ଣନାଭ' ଅଶ୍ୱ
ଦଉଡି ରୂପେ 'ବାସୁକୀ' ହେଲେଣି ପ୍ରକାଶ ll
ରଥ ଦେବ 'ବାସୁଦେବ', ସାରଥୀ 'ମାତଳୀ'
ଏ ରଥର ଶୌର୍ଯ୍ୟ ସୌନ୍ଦର୍ଯ୍ୟ ହେବନାହିଁ କଳି
ପାର୍ଶ୍ଵ ଦେବୀ-ଦେବତା ହୋଇ ଅପେକ୍ଷମାଣ
କରୁଛନ୍ତି ହଳଧର ପ୍ରଭୁଙ୍କୁ ସ୍ମରଣ ll
'ଗଣେଶ' 'କାର୍ତ୍ତିକ' 'ମୃତ୍ୟୁଞ୍ଜୟ' 'ମୁକ୍ତେଶ୍ଵର'
'ଶେଷଦେବ' 'ହଟାୟୁଧ' ଏବଂ 'ନଟମ୍ଭର'
'ସର୍ବମଙ୍ଗଳା' 'ପ୍ରଳମ୍ବରୀ' ଦେବୀ ଯେ ଦୁଇ
ନ' ପାର୍ଶ୍ଵ ଦେବୀ-ଦେବତା ରଥାରୂଢ଼ ହୋଇ ll
ବୟାଳିଶ ଫୁଟ ଉଚ୍ଚ ସେ 'ଦର୍ପ ଦଳନ'
ରଥ ସୁଭଦ୍ରାଙ୍କ: ନାଶେ ଗର୍ବ ଅଭିମାନ
ବାର ଗୋଟି ଚକ ଖଞ୍ଜା ଆଗ ପଛ ହୋଇ
ରଥ ଦେବୀ ରୂପେ 'ଜୟଦୁର୍ଗା' ଛନ୍ତି ରହି ll
ରକ୍ତ କୃଷ୍ଣ ବର୍ଣ୍ଣ ଅଟେ ରଥ ବେହରଣ
କୃଷ୍ଣ ବର୍ଣ୍ଣେ ମାତୃ ଶକ୍ତିଙ୍କର ଆଭରଣ
ଧ୍ବଜା ନାମ 'ନାଦମ୍ବିକା', ସାରଥୀ 'ଅର୍ଜୁନ'
ପତି ସିଏ ପତ୍ନୀଙ୍କର ବଢ଼ାନ୍ତି ସମ୍ମାନ ll
'ରୋଚିକା' 'ମୋଚିକା' 'ଜିତା' ଓ 'ଅପରାଜିତା'
ଚାରି ଅଶ୍ୱ ମୁଗ୍ଧ: ଆସିବେ ସୁଭଦ୍ରା ମାତା
'ଚଣ୍ଡୀ' 'ଚାମୁଣ୍ଡା' 'ଉଗ୍ରତାରା' ଓ 'ବନଦୁର୍ଗା'
'ଶୁଳିଦୁର୍ଗା' 'ବରାହୀ' 'ଶ୍ୟାମାକାଳୀ' ବି ଉଭା ll
'ମଙ୍ଗଳା' 'ବିମଳା' ମିଶି ନଅ ପାର୍ଶ୍ଵ ଦେବୀ
ଦର୍ପ ଦଳନ ରଥରେ ଦେଖିବେ ପୃଥିବୀ
'ସ୍ୱର୍ଣ୍ଣଚୁଡ଼ ନାଗୁଣୀ' ହେବ ରଥ ଦଉଡି
ବଡଦାଣ୍ଡ ମଧ୍ୟେ ରଥ ଯିବ ଗଡି ଗଡି ll
ପଇଁଚାଳିଶ ଫୁଟ ଉଚ୍ଚ ରଥ 'ନନ୍ଦିଘୋଷ'
ଷୋହଳ ଚକ ବିଶିଷ୍ଟ, ସାତ ଫୁଟ ବ୍ୟାସ
ରକ୍ତ-ପୀତ ବର୍ଣ୍ଣ ଅଟେ ରଥ ବେହରଣ
ପୀତବାସ-କେଶବ ସେ ଦୁଃଖର ହାରଣ ll
ରଥର ଦେବ 'ଗରୁଡ଼', ସାରଥୀ 'ଦାରୁକ'
'ତ୍ରୈଲୋକ୍ୟମୋହିନୀ' ଧ୍ବଜା ଆଣଇ ଚମକ
'ଶଙ୍ଖ' 'ବଳହକ' 'ସୁବେତ' ଓ 'ହାରିଦଶ୍ୱ'
ପ୍ରସ୍ତୁତ ହୋଇ ଅଛନ୍ତି ଚାରିଗୋଟି ଅଶ୍ୱ ll
'ବରାହ' 'ଗୋପୀକୃଷ୍ଣ' 'ନୃସିଂହ' 'ଗୋବର୍ଦ୍ଧନ'
'ରାମ' 'ନାରାୟଣ' 'ତ୍ରିବିକ୍ରମ' 'ହନୁମାନ'
'ରୁଦ୍ର' ସମେତ ନଅ ଜଣ ପାର୍ଶ୍ଵ ଦେବତା
ରଥରେ ଉଭା ଭେଟିବାକୁ 'ଜଗତକର୍ତ୍ତା' ll
'ଶଂଖଚୂଡ ନାଗୁଣୀ' ହେବ ରଥ ଦଉଡି
ଶ୍ରଦ୍ଧାଳୁ ସମସ୍ତେ ନେବେ ବଡ଼ଦାଣ୍ଡେ ଭିଡି
ଦେଖିବ ଧରଣୀ ଏଇ ମନୋହର ଦୃଶ୍ୟ
ନଭ ପୟ ଅଗ୍ନି ବାୟୁ ସର୍ବେ ହେବେ ତୋଷ ll
ଆସ ଆସ ଉଭା ହୁଅ ଜଗତର ନାଥ
ଉଚ୍ଚାଟ ହେଲେଣି ସବୁ ଭକ୍ତ ରଥ ପଥ
କେମିତି ଏ ରାତି ପାହି ହେବ ଉଷାକାଳ
ରଥଯାତ୍ରା: ହେବ 'ଭକ୍ତ ଭଗବାନ ଖେଳ' ll
===================================
ପ୍ରମୋଦ କୁମାର ମହାନ୍ତି ll
No comments:
Post a Comment