କଳାକାର କଳାହାଣ୍ଡି
{ମିହିର ଦାସଙ୍କ ବିୟୋଗରେ ଶୋକାପ୍ଲୁତ ଶ୍ରଦ୍ଧାଞ୍ଜଳୀ କବିତାରେ}
✍କବି ଶ୍ରୀ ଦେବଦତ୍ତ ପ୍ରଧାନ।
ରଘୁରାଜପୁର ,ପୁରୀ ,ଓଡିଶା।
ମିହିର ମହୀର ମାହାର ଆଉ ନାହାଁନ୍ତି ଦେଖ
ମୁକୁଟ ମଣ୍ଡିତ ମୋହର ଲିଭେ ଶେଷ ମୟୂଖ ॥
ମୋହନ ମହଣ ମହାର୍ଘ୍ୟ ମହାନ କଳାକାର
ମୋହିଲେ ମହତ କହ,ତ ସିନେ କଳା ଶିଖର ॥
ମଣ୍ଡିଲେ ପଣ୍ଡିତ ପିଣ୍ଡକୁ ତୁଣ୍ଡ ବାଇଦ ଢାଙ୍କି
ମନ୍ମଥ ନେପଥ୍ୟ ପଥକୁ ରଥ ପଡିଛି ଝାଙ୍କି ॥
ମୁଠାଏ ପାଉଁଶ ଉଠଇ ସତ୍ୟ ଏହି ବଚନ
ମୁଠିକ ତଣ୍ଡୁଳ ମଣ୍ଡଳ ବିଛି କଳା ରଚନ ॥
ମହିର ନିହାରେ ବିହରେ ବିହାୟସ ମାର୍ଗରେ
ମଣ୍ଡିଣ ଦାଣ୍ଡକୁ ଭଣ୍ଡିଲେ ପଉଋଷ ଆଗରେ ॥
ମଣିଷ ହାରଇ ମରଣେ ଏତ ବିଚିତ୍ର କଥା
ମୁଥା ମୂଳେମଥା ଥୋଇଣ,ରଚେ ନାନାଦି ପନ୍ଥ ॥
ମହକ ନିର୍ମଳ-ମୁକୁର ମହତ ପଣ ଯାର
ମାଖିଅଭିନୟ ବିନୟେ ଢାଳି ନୟନସାର ॥
ମନ୍ଥିଲେ ଗୁନ୍ଥିଣ କିରତୀ କାନ୍ଥ ଲେପନ କରି
ମଖିଚୋଷ ଗୁଣ ତେଜିଣ ରଞ୍ଜି ଖଞ୍ଜି୍ଲେ ଘୋରି ॥
ମଞ୍ଚଖଳା କଳା କୋଳେଇ,ଗୋଳି ବୋଳି ବିଷୟ
ମୁଞ୍ଚି ନ,ପାରଇ ଜନତା,ଦେଖି ସେ,ଅଭିନୟ ॥
ମଞ୍ଜାରୀ ଝାମ୍ପିବ ଦିନେଟି ତୁମେ ଯାଇଛ କହି
ମିଛମାୟା ମିଛ ସଂସାର ତୁଛା ଖେଳୁଛି ମୁହିଁ ॥
ମରଣ ଚରଣ ଛୁଇଁଛି ଚାରଣ ସ୍ମୃତି ବାଣ
ମୃତ୍ୟୁଞ୍ଜୟୀ ମହାମହିମ କଳା କଳ୍ପ ରୂପେଣ ॥
ମହୀରେ କେ ନାହାଁନ୍ତି ବୀର ତାକୁ ପାରିବ ଭଣ୍ଡି
ମଧୁପଥଯାତ୍ରୀ ଶତେକ କଳିଙ୍ଗ କଳାହାଣ୍ଡି ॥
No comments:
Post a Comment