✍ ପ୍ରମୋଦ କୁମାର ମହାନ୍ତି
ଗୋଟିଏ ବିଦ୍ୟାଳୟ ସମାସ୍କନ୍ଦ ତିନି ବନ୍ଧୁ କଥା
ନକହିଲେ ସବୁକଥା ଖୋଲି, ମୋ କବିପଣ ବୃଥା
ଏକାନ୍ତ ଘନିଷ୍ଠ ତିନିହେଁ ଶ୍ରେଣୀ ଓ ଶ୍ରେଣୀ ବାହାରେ
ସେମାନଙ୍କ ନିଷ୍ଠା ଏକାଗ୍ରତା କହିଲେ ବି ନସରେ ll
ପ୍ରଥମ ବନ୍ଧୁ ଟି ବିଦ୍ୟା ବୁଦ୍ଧି ରେ ଅତି ବିଚକ୍ଷଣ
ଶିକ୍ଷକ ମାନଙ୍କ ପ୍ରିୟ, ସାଙ୍ଗଙ୍କ ଈର୍ଷା ର କାରଣ
ନିରବଛିନ୍ନ ଭାବେ ତା'ର ବିଦ୍ୟା-ମେଧା ର ପ୍ରଗତି
ସ୍କୁଲ କଲେଜ ୟୁନିଭର୍ସିଟି ଟପ୍ପର ସଦା ବ୍ରତୀ ll
ଦ୍ଵିତୀୟ ଟି ଯାହିତାହି ସାଧାରଣ ପାଠ ଓ ଜ୍ଞାନ
ଫେଲ ହୋଇନାହିଁ ସିନା, ମନ ଟା ତାହାର ବିଷର୍ଣ୍ଣ
ଶିକ୍ଷକ ମାନଙ୍କ ନଥାଏ ଧ୍ୟାନ, ହୁଏସେ ଉତ୍ତୀର୍ଣ୍ଣ
ପ୍ରଚେଷ୍ଟା ରଖେ ତ ଜାରି, ଜୀବିତ ମନ ଓ ସପନ ll
ତୃତୀୟ ସାଙ୍ଗ ଭାରି ଚତୁର ଧୂର୍ତ୍ତ କଳା ନିପୁଣ
ସମସ୍ତଙ୍କୁ ମନେଇ ମଜେଇ ସାରୁ ପରିବା ଜାଣ
ପାଣିରେ ସର ପକେଇ କହିପାରେ ସେ କେତେ କଥା
ତଥାପି ତା' ଗାଥା ଶୁଣିବାକୁ ରୁଣ୍ଡ ହୁଅନ୍ତି ଶ୍ରୋତା ll
ଏହି ତିନିଜଣ ବନ୍ଧୁ କିନ୍ତୁ ସବୁବେଳେ ଘନିଷ୍ଠ
ସ୍କୁଲ ଶିକ୍ଷା ସମାପ୍ତ ପର୍ଯ୍ୟନ୍ତ ଏକତ୍ରିତ ନିବିଷ୍ଟ
ରୂପ ଗୁଣ ବିଦ୍ୟା ମେଧା ବୁଦ୍ଧି ରେ ଥାଇ ବି ପ୍ରଭେଦ
ସେମାନଙ୍କ ବନ୍ଧୁତା ର କଳସ ରେ ନଥାଏ ଛିଦ୍ର ll
ପ୍ରାୟ ପାଞ୍ଚ ଛଅ ବର୍ଷ ପରେ ପ୍ରଥମ ହେଲା ଯନ୍ତ୍ରୀ
ବିଚକ୍ଷଣ ଧୀ-ଶକ୍ତି ସହ ନୂତନ ସନ୍ଧାନ ରେ ବ୍ରତୀ
ଭାରତୀୟ ଇଞ୍ଜିନିଅରିଂ ସେବାରେ ସଫଳ ଓ ଶ୍ରେଷ୍ଠ
ଭାରତୀୟ ରେଳ ରେ ମୂଖ୍ୟ ଯନ୍ତ୍ରୀ କର୍ମେ ଏକନିଷ୍ଠ ll
ଦ୍ଵିତୀୟ ପଦାର୍ଥ ବିଜ୍ଞାନ ରେ ସ୍ନାତକ ସାଧାରଣ
ଭାରତୀୟ ପ୍ରଶାସନିକ ସେବା ରେ ଅତି ନିପୁଣ
ସଞ୍ଜୋଗ: ପ୍ରଥମ ବନ୍ଧୁ ର ହେଲେ ଉପର ହାକିମ
ବିଭିନ୍ନ ପଦ ପଦବୀ ରେ ପ୍ରଶଂସା ପ୍ରାପ୍ତି ଅସୀମ ll
ତୃତୀୟ ସେ ଚତୁର ଧୂର୍ତ୍ତ ସ୍କୁଲ ପରେ ପାଠ ଶେଷ
'ଠିକ ବେଳ ରେ ଠିକ ଦଳ': ରାଜନୀତି ରେ ପ୍ରବେଶ
କାଳକ୍ରମେ ସେ ସାଂସଦ ଓ କ୍ୟାବିନେଟ ପାହ୍ୟା ମନ୍ତ୍ରୀ
ପ୍ରଥମ ଦୁଇ ବନ୍ଧୁ ଙ୍କ ଭାଗ୍ୟ ନିର୍ଦ୍ଧାରଣ କରନ୍ତି ll
ଗପ ଭଳି ଲାଗିଲେ ବି କାହାଣୀ ଟି ସମ୍ପୂର୍ଣ୍ଣ ସତ୍ୟ
ପ୍ରଥମ ଟି 'ମେଟ୍ରୋ ମ୍ୟାନ': 'ଇ ଶ୍ରୀଧରନ' ନାମେ ଖ୍ୟାତ
ଦ୍ଵିତୀୟ 'ଶେଷାନ' ମୂଖ୍ୟ ନିର୍ବାଚନ କମିଶନର
ତୃତୀୟ 'କେ ପି ଉନ୍ନିକୃଷ୍ଣନ': ରାଜନେତା ଚତୁର ll
================================
No comments:
Post a Comment