~: କ ମାନେ ନା ? :~

             ✍ କୁୁୁୁଳମଣି ସାହୁ 

କବାଟ ନ ଦିଏ ବାଟ

କଜ୍ଜ୍ବଳେ ନାହିଁ ଜ୍ବଳନ

କପଟୀ ନ ଥାଏ ପଟେ

କରଣ କି କରେ ରଣ?

କନିଆ ନ ଜାଳେ ନିଆଁ

କମାର କି କା'କୁ ମାରେ?

କରକା କି ଦିଏ ରକା?

କଦଳୀ କି କା'କୁ ଦଳେ?

କବରକୁ ବରେ କିଏ?

କବନ୍ଧକୁ କିଏ ବାନ୍ଧେ?

କବଳରେ ବଳଶୂନ୍ଯ

କନ୍ଦର୍ପ କି ଦର୍ପେ ବିନ୍ଧେ?

କଥକେ ଥକା ନ ଥାଏ

କନିଷ୍ଠେ ନିଷ୍ଠା ନ ରହେ

କପାଳୀ କାହାକୁ ପାଳେ?

କବୀର କି ବୀର ହୁଏ?

କମଳେ ମଳ ନ ଥାଏ

କଲମ୍ବ ନ ଲମ୍ବିଯାଏ

କଉଡ଼ି ନ ଯାଏ ଉଡ଼ି

କରଜେ କି ରଜ ହୁଏ?

କବାଡ଼ି ନ ଲୋଡ଼େ ବାଡ଼ି

କମାନ କା'କୁ ନ ମାନେ

କବିରାଜ ଆପେ ଆସି

ନ ବିରାଜେ ସନ୍ନିଧାନେ।

ସରଳାର୍ଥ:-

କବାଟ ନ ଦିଏ ବାଟ- 

କବାଟ କାହାକୁ ବାଟ ଦିଏନାହିଁ। କବାଟ ଖୋଲିଲେ ହିଁ ବାଟ ମିଳେ।

କଜ୍ଜ୍ବଳେ ନାହିଁ ଜ୍ବଳନ- 

କଜ୍ଜ୍ବଳ ଲଗାଇଲେ ଜଳାପୋଡ଼ା ହୁଏନାହିଁ। ବରଂ ଜ୍ବଳନ ଉପଶମ ହୁଏ।

କପଟୀ ନ ଥାଏ ପଟେ- 

କପଟୀ ଲୋକ ଆପଣଙ୍କ ପଟେ ଥିଲା ଭଳି ଅଭିନୟ କରୁଥିଲେ ସୁଦ୍ଧା ପ୍ରକୃତରେ ନଥାଏ।

କରଣ କି କରେ ରଣ?- 

କରଣ ପଦବୀର ଲୋକ ରଣ କରେନାହିଁ। ସେ କେବଳ ଲେଖାଲେଖି ଓ ହିସାବପତ୍ର କାମ କରେ।

କନିଆ ନ ଜାଳେ ନିଆଁ-

କନିଆ ନିଆଁ ଜଳାଏ ନାହିଁ।

ବରଂ ଯୌତୁକ ଆଦି କାରଣରୁ ଅନ୍ୟମାନେ ତା ଦେହକୁ ନିଆଁରେ ଜଳାଇଦିଅନ୍ତି।

କମାର କି କା'କୁ ମାରେ?-

କମାର କାହାକୁ ମାରେ କି? ସେ କେବଳ ହାତହତିଆର ଓ ଅସ୍ତ୍ରଶସ୍ତ୍ର ତିଆରି କରେ। 

କରକା କି ଦିଏ ରକା?-

କରକା ଆଘାତରେ କାହାର ରକା ହୋଇଯାଏ କି?

କଦଳୀ କି କା'କୁ ଦଳେ?- 

କଦଳୀ କାହାକୁ ଦଳେ କି? ବରଂ କଦଳୀକୁ ସମସ୍ତେ ଦଳିଦିଅନ୍ତି।

କବରକୁ ବରେ କିଏ?- 

କବରକୁ କେହି ବରଣ କରେ କି? କବରକୁ ବରିବା ଅର୍ଥ ମୃତ୍ୟୁ ଚାହିଁବା। କେହି କେବେ ମରିବାକୁ ଚାହେଁନାହିଁ।

କବନ୍ଧକୁ କିଏ ବାନ୍ଧେ?-

କବନ୍ଧ ଅର୍ଥାତ୍ ମୁଣ୍ଡବିହୀନ ଶବ। ଶବକୁ କେହି ବାନ୍ଧିନିଏ ନାହିଁ। କେବଳ ଜୀବିତ ଲୋକକୁ ଗିରଫ କରାଯାଏ।

କବଳରେ ବଳଶୂନ୍ଯ- 

ଜଣେ ବ୍ୟକ୍ତି ଅନ୍ୟ ଜଣଙ୍କର କବଳରେ ପଡ଼ିଲେ ବଳଶୂନ୍ଯ ହୋଇଯାଏ ଅଥବା ବଳଶୂନ୍ଯ ହୋଇଗଲେ ଅନ୍ଯର କବଳରେ ପଡ଼େ।

କନ୍ଦର୍ପ କି ଦର୍ପେ ବିନ୍ଧେ?-

କନ୍ଦର୍ପ କାହାରିକୁ ଦର୍ପ ସହିତ କାମବାଣ ବିନ୍ଧେ କି? ସେ ଅଶରୀରୀ। ଅଦୃଶ୍ଯରେ ରହି ଫୁଲଶର ମାରେ।

କଥକେ ଥକା ନ ଥାଏ-

କଥକ ନୃତ୍ୟ ଏତେ ସୁନ୍ଦର ଓ ମନୋମୁଗ୍ଧକର ଯେ ନାଚିବା କିଂବା ନାଚ ଦେଖିବା ଲୋକକୁ ଥକା ଲାଗେ ନାହିଁ।

କନିଷ୍ଠେ ନିଷ୍ଠା ନ ରହେ- 

କନିଷ୍ଠ ଅର୍ଥାତ୍ କମ୍ ବୟସର ବ୍ୟକ୍ତିଙ୍କ ପାଖରେ ନିଷ୍ଠାର ଅଭାବ ଥାଏ। ସେମାନେ ସ୍ବଭାବତଃ ଚଞ୍ଚଳମନା।

କପାଳୀ କାହାକୁ ପାଳେ?-

କପାଳୀ ଅର୍ଥାତ୍ ଶିବ। ଶିବ କାହାର ପାଳନ କରନ୍ତି କି? ॐ ବା ଅଉମ୍ ଅନ୍ତର୍ଗତ ଅ ଅର୍ଥ ସୃଷ୍ଟିକର୍ତ୍ତା ବ୍ରହ୍ମା। ଉ ବା ବିଷ୍ଣୁ ହେଲେ ପାଳନକର୍ତ୍ତା ବିଷ୍ଣୁ। ମ ବା ମହେଶ୍ବର ହେଉଛନ୍ତି ସଂହାରକର୍ତ୍ତା।

କବୀର କି ବୀର ହୁଏ?-

କବୀର ଜଣେ ମହାନ୍ ସନ୍ଥକବି। ସେ ବୀର ଭାବରେ ଯୁଦ୍ଧରେ ଅବତୀର୍ଣ୍ଣ ହେବେ ନାହିଁ।

କମଳେ ମଳ ନ ଥାଏ-

କମଳ ବା ପଦ୍ମପୁଷ୍ପ ଅତୀବ ନିର୍ମଳ। ପଙ୍କ ଭଳି ମଇଳାରୁ ଜନ୍ମ ହେଲେ ହେଁ ତାହା ଅମଳିନ।

କଲମ୍ବ ନ ଲମ୍ବିଯାଏ-

କଲମ୍ବ ବା ଶର ଆପେ ଲମ୍ବିଯାଏ ନାହିଁ। ଦୂରରେ ଥିବା ଲକ୍ଷ୍ୟକୁ ଭେଦ କରିବାପାଇଁ ତାକୁ ଧନୁରେ ଯୋଖି ନିକ୍ଷେପ କରିବାକୁ ହୁଏ।

କଉଡ଼ି ନ ଯାଏ ଉଡ଼ି-

କଉଡ଼ି ଏକ ଶକ୍ତ ଖୋଳପାଯୁକ୍ତ ସାମୁଦ୍ରିକ ଜୀବ।  ଆକାର ତୁଳନାରେ ଭାରୀ ହୋଇଥିବାରୁ ସେ ଉଡ଼ିଯାଏ ନାହିଁ।

କରଜେ କି ରଜ ହୁଏ?-

ରଜ ଏକ ଆନନ୍ଦଦାୟକ ପର୍ବ। ପିଠାପଣା, ଦୋଳି ଓ ରଜପାନ ଏହାର ବିଶେଷତ୍ଵ। କରଜ ବା ଋଣ କରି ରଜ ପାଳିବାରେ ମଜା ଥାଏ କି?

କବାଡ଼ି ନ ଲୋଡ଼େ ବାଡ଼ି-

କବାଡ଼ି ଖେଳରେ ବାଡ଼ିର କିଛି ଭୂମିକା ନଥାଏ। କ୍ରିକେଟ୍, ହକି ପ୍ରଭୃତି ଖେଳରେ ବାଡ଼ି ଲୋଡ଼ା ପଡ଼େ।

କମାନ କା'କୁ ନ ମାନେ-

କମାନ ବା କମାଣର ଏତେ ଶକ୍ତି ଯେ ସେ କାହାକୁ ଖାତିର କରେ ନାହିଁ।

କବିରାଜ ଆପେ ଆସି

ନ ବିରାଜେ ସନ୍ନିଧାନେ।-

କବିରାଜ ବା ବୈଦ୍ଯ ଆପେ ଆସି କାହା ନିକଟରେ ପହଞ୍ଚନ୍ତି ନାହିଁ। ଦରକାର ପଡ଼ିଲେ ତାଙ୍କ ପାଖକୁ ଯିବାକୁ ହୁଏ ଅଥବା ଡାକିଆଣିବାକୁ ପଡ଼େ।

ଅତଏବ ଏତାଦୃଶ ଶବ୍ଦମାନଙ୍କରେ କ ଅକ୍ଷରଟି ନକାରାତ୍ମକ ବା ନାହିଁ ଅର୍ଥରେ ବ୍ୟବହୃତ ହୋଇଥିବା ପରି ମନେ ହୁଏ।