● କ୍ଷେତ ଭ୍ରମଣ ●

ଗୃହରୁ ବାହାରି ଉପବନ ମଧ୍ୟେ 

    ପଥପରେ ଗଲି ଚାଲି ଚାଲି ।

କୁବେର ସମ ଶସ୍ୟ ର ଭଣ୍ଡାର 

    ନୟନ ଦେଖିବ ମୋ ବୁଲି ବୁଲି ।।୧

 କୁଳୁକୁଳୁ ନାଦ ହିଡ ଭାଙ୍ଗି 

    ବୋହିଯାଏ ଧୀର ଧାର ।

ହସେ ଝୁଲି ଝୁଲି ମନଖୋଲି 

    ନାଚୁଛି ରସିକ ସମୀର  । ।୨

ପବନ ହିଲ୍ଲୋଳେ ଧାନଗଛ

   ନାଚୁଅଛି ଡେଇଁ ଡେଇଁ ।

ହରିତ ପରସ୍ତ ଉର୍ମି ମାତୁଛି 

    ଗାଏ ଆଜି  ମନ ଭୁଇଁ  ।।୩

ଗଗନେ ଧଳା କଳା ଜଳଦ 

     ବିଲକୁ ଜୋଡିଏ ବଳଦ ଲୋଡ଼ା ।

ବାରିଦ ବର୍ଷିଣ ବଳଦ ଚଷିଣ 

   ରଚିବେ ସୁନାର ଫସଲ ତୋଡା ।।୪

ଗୀତିକାର ଏଠି ପବନ ସାଜିଛି 

    ବାଜଣା ବଜାଏ ମେଘନାଦ ।

ନର୍ତ୍ତକୀ ରୂପେ ଅବନୀ ରାଣୀ 

    ଶିହରଣ ଶୁଣି ଏ ଶବଦ  ।।୫ 

ତୁଷାର ଛାଉଣୀ ଶିଶିର ପ୍ରକାର 

    ସ୍ୱେତ ସ୍ୱେତ ଲାଗେ ଭୂଧର ।

ହିମାଚଳ ଭ୍ରମ ଉପୁଜାଇ ଦିଏ 

   ମେଘର ଏମନ୍ତ  ଆସର   ।।୬  

କଣ୍ଟି କୁ ଜାବୁଡ଼ି ଅଣ୍ଟା ତାର ଭିଡ଼ି 

   ଛାଟ ପରେ ଛାଟ ମାରି  ।

ଗୀତ ଗାଇ ଗାଇ ମନ ନଚେଇ 

     ଚାଷୀଭାଇ ମୋର ଏହିପରି ।।୭ 

ଦିବା ସମୟେ ନାହିଁ ଦିବାକର 

   ସୁକ୍ଷ୍ମ ଆଲୋକ ର ଧାରା  ।

ଅସରାଏ ଝଡ଼ି ଯାଏ ବରଷି 

   ଜଳମୟୀ ଆଜି  ଧରା  ।।୮  

ଗଗନ ପବନ ହସି ଉଠନ୍ତି 

   ଚାରିଦିଗେ ସବୁଜିମା ।

ଶସ୍ୟ ର ଲହରୀ  ସୃଜି ଦେବେ 

    ଆମର ଧରିତ୍ରୀ ମା  ।।୯  

ସୁନ୍ଦର ଏ ଚିତ୍ର ଶତ ପବିତ୍ର  

    ଚିତ୍ତ ପଟେ ସଦା ସ୍ଥାନ ।

ଭାଳୁଅଛି ମୁହିଁ ଭାଳୁଥିବି  

   ଦୃଶ୍ୟ ନାମେ ତୁହି ମହାନ ।।୧୦ 

            ✍ରାକେଶ ରତନ ପ୍ରଧାନ