ସ୍ରଷ୍ଟାଙ୍କ ସୃଷ୍ଟିରେ ବିଶ୍ୱାସ ବୃଷ୍ଟିରେ
ପ୍ରମୁଖ ଚରିତ୍ର ଯୋଡା
କେଉଁଟି ସୁପଥ ଜୀବନ ଜାଗ୍ରତ
କେଉଁ ଗୋଟି ଅସଜଡା
ଅସଜଡା ମନ ନିରାଶେ ନିମଗ୍ନ
ଧାଁ ଦଉଡ଼ ଜୀବନରେ
ପରଖିବା ଆସ କିଏ ଓଠେ ହସ
ଏକବିଂଶ ଶତାବ୍ବୀରେ
ଶତାବ୍ବୀର ସ୍ଥିତି ନିରବେ ନିଇତି
ନୟନୁ ନିଗାଡ଼େ ନୀର
କାଚ କାଞ୍ଚନର ଏ ରଣ ହୁଙ୍କାର
ଧର୍ମେ ମାରେ ଆଖି ଠାର
କିଏ ବେଦରଦି ସୁଖର ସମ୍ବନ୍ଧି
ସମୟର ସାରଣୀରେ
କିଏ ତ୍ୟାଗି ଭୋଗି କିଏ ଅନୁରାଗି
ମାଟି ବଇକୁଣ୍ଠ ପୁରେ
ଭାଇର ଭରଷା ଅମୃତ ପରସା
କାଳ୍ପନିକ କଳିକାଳେ
ମମତା ମୂହାଣି ସୁଭଦ୍ରା ଭଉଣୀ
ଭାଳେଣି ଏ ଭୂମଣ୍ତଳେ
ପତ୍ନୀ ପରାକାଷ୍ଟା ସ୍ୱାର୍ଥରେ ସଂଶ୍ଳିଷ୍ଟା
ଏ ସୀତା ସାବିତ୍ରୀ ଦେଶେ
ନୁହଁ ଅନୁଗାମୀ ଆଦର୍ଶକୁ ଚୁମି
ଅନ୍ତର୍ଦାହ ଅବକାଶେ
ପୁଅ ଅବା ଝିଅ ନିଆରା ନିର୍ଣ୍ଣୟ
ରକତ ରୀତିରେ ରଞ୍ଜା
ନାହିଁ ଦାନା କନା ବିଷାଦ ବଇନା
ପ୍ରତାରଣେ ପୁଳେ ପଞ୍ଝା
ବନ୍ଧୁ ଶବ୍ଦଟିଏ ସମ୍ପର୍କର ଖିଏ
ଦ୍ୱାପର ଦାଣ୍ତରେ ଦିଶେ
ଏଠି ବ୍ୟବସାୟ ବନ୍ଧୁତା ବିଷୟ
କର୍ତ୍ତବ୍ୟ କୋହୋଳ କ୍ଳେଶେ
କ୍ଳେଶକୁ ଆବୋରି ଯୋଗାନ୍ତି ଜରୁରୀ
ଜଗତରେ ଯିଏ ଜାଣ
ଆହା ବାପା ମାଆ ହିଲ୍ଲୋଳର ହିଆ
ସ୍ରଷ୍ଟାଙ୍କ ଭିନ୍ନ ଭିଆଣ
ବାପା ବାଞ୍ଛା ବଟ ମାଆ ହସ ହାଟ
ତେଲ ଲୁଣର ସଂସାରେ
ଏହା ହିଁ ନିଚ୍ଛକ ବିଶ୍ୱେ ବେଦ ବାକ୍ୟ
ଲେଖ ହୃଦ ହସ୍ତାକ୍ଷରେ
✍ ଦାଶରଥି ସାହୁ କଳମ୍ବ/ଗଞ୍ଜାମ
No comments:
Post a Comment