ଜାତିର ଜନକ ତୁମେ ଆଜି ମୂକ
କାଚ ବନ୍ଧା ଚିତ୍ର ତଳେ
ଏକବିଂଶ ଶତାବ୍ବୀର ଏ ମଣିଷ
କପଟର ପଶା ଖେଳେ
ତୁମ ରାମରାଜ୍ୟ ହେଲାଣି କଦର୍ଯ୍ୟ
ବଢି ଚାଲିଛି ଦୁଷ୍କର୍ମ
ଅସହାୟ ହୋଇ ମଥାକୁ ନୁଆଁଏ
ଅହିଁସା ପରମ ଧର୍ମ
ତୁମେ କହିଥିବା ମିଠା ମୂଳ ମନ୍ତ୍ର
ଏ ପିଢିରେ ଅକାରଣ
ଶାଗୁଣା ବିଲୁଆ ସେବା ଯୋଗାଇଲେ
ଶବ କି ପାଇବ ପ୍ରାଣ ?
ଆପ୍ରାଣ ଉଦ୍ୟମେ ବାଡି ଖଣ୍ତେ ଧରି
ଦେଶ କୁ କଲ ସ୍ବାଧୀନ
ସ୍ୱାଧୀନତା ସତ୍ତା ଆଜି ସମାଧିସ୍ଥ
ଦିଶଇ ଯାହା ବିବର୍ଣ୍ଣ
ସ୍ୱର୍ଣ୍ଣ ପ୍ରସବିନୀ ଜନ୍ମ ଭୂମୀ ତ୍ରସ୍ତ
ବିସ୍ମୃତ ସ୍ବରାଜ ମନ୍ତ୍ର
ଲୋକ ଦେଖାଣିଆ ପତକା ଉଡୁଛି
ମିଛ ଏଠି ଲୋକ ତନ୍ତ୍ର
ଦେଇଥିଲ ସତ୍ୟ ଅହିଂସା ସ୍ୱଚ୍ଛତା
ମୂଳମନ୍ତ୍ର ଏକତାର
ଗଗନେ ପବନେ ଚଉଦିଗେ ଭିଡ
ବିଭ୍ରାଟ ଓ ଭ୍ରଷ୍ଟାଚାର
ଉଜୁଡିଛି ତୁମ ସ୍ବରାଜ ସପନ
ହୋଇଛି ମୁଠେ ପାଉଁଶ
ପରାଧୀନ ଦେଶ ସ୍ଵାଧୀନ ନିମନ୍ତେ
ମାଟିକୁ ଓହ୍ଲେଇ ଆସ
ଦାଶରଥି ସାହୁ
କଳମ୍ବ/ଗଞ୍ଜାମ
No comments:
Post a Comment