"ମନର ମୂଳେ ଏ ଜଗତ"
ଆମେ ଅର୍ଥାତ୍ ମଣିଷ ମାନେ ସାମାଜିକ ପ୍ରାଣୀ। ସମାଜ ଭିତରର ନୀତି ନିୟମ ସବୁ ଆମେ ତିଆରି କରୁ ଯାହାକି ସମାଜରେ ଶାନ୍ତିପୂର୍ଣ୍ଣ ବାତାବରଣ ସୃଷ୍ଟି କରିବା ହିଁ ଲକ୍ଷ୍ୟ ହୋଇଥାଏ । ଏଥିପାଇଁ ଆମ ମନର ମଧ୍ୟ ଏକ ଗୁରୁତ୍ୱପୂର୍ଣ୍ଣ ଭୂମିକା ରହିଛି। ପ୍ରତ୍ୟେକ କଥାର ବା କାମର ନକରାତ୍ମକ ବା ସକରାତ୍ମକ ଚିନ୍ତାଧାରା ଥାଏ । ଯଦି ମନ ସବୁବେଳେ ସକରାତ୍ମକ ଚିନ୍ତାଧାରାରେ ରହେ ତାହେଲେ ଜଗତର ମଙ୍ଗଳ ସୁନିଶ୍ଚିତ।
ଏହି ଧାରାରେ "ମନ" ମୁଖ୍ୟ ଭୁମିକା ନିର୍ବାହ କରେ । ପୌରାଣିକ କାହାଣୀ ହେଉ କି ଐତିହାସିକ କାହାଣୀ ଅବା ସାମାଜିକ କାହାଣୀ ସବୁଠି ମନର ଉପସ୍ଥିତି ରହିଛି। ସମ୍ରାଟ ଅଶୋକ ମନ ପରିବର୍ତ୍ତନ ତଥା ସକାରାତ୍ମକ ଧାରାରେ ଧର୍ମାଶୋକ ରୂପେ ପ୍ରତିଷ୍ଠା ପାଇଛନ୍ତି । ଦୁର୍ଯ୍ଯୋଧନ ଓ ଶକୁନିର ନକରାତ୍ମକ ଧାରା ପାଇଁ ଆଜି ସମାଜ ସେମାନଙ୍କୁ ଖଳନାୟକ ବୋଲି କହୁଛି । ଏଭଳି ଅନେକ କାହାଣୀ ଆମକୁ ଅନେକ ଶିକ୍ଷାଦିଏ କିନ୍ତୁ ମନ ଯେଉଁଭଳି ଗ୍ରହଣ କରିବ ବା ପାଳନ କରିବ ସେହି ହିସାବରେ ସମାଜ ଉପକୃତ ହେବ ।
ମନ ହିଁ ଜୀବନର ଲକ୍ଷ୍ୟ ସ୍ଥଳ ନିର୍ଣ୍ଣୟ କରିବାରେ ସର୍ବୋତ୍ତମ ଭୂମିକା ଗ୍ରହଣ କରିଥାଏ । ମନ ସ୍ଥିର କରି ବୈଜ୍ଞାନିକ ତାର ସଫଳତା ହାସଲ କରେ ଏବଂ ସନ୍ୟାସୀ ମୋକ୍ଷ ଲାଭ କରେ । ଏଣୁ ମନର ମୂଳେ ହିଁ ଏଜଗତ ତିଷ୍ଠିଛି।
✍ ଜିନି ପଟ୍ଟନାୟକ, ଗଞ୍ଜାମ
No comments:
Post a Comment